Armas kieli

Kezäkuul oli ilmoitettu abuden’goih yhteiskunnallizih liittoloih niškoi kilvan tulokset. Kilvan pidi Karjalan Kanzallizen da alovehellizen politiekan ministerstvu Karjal on meijän kodi — programman mugah. Kaikkiedah kilvah oli työtty 43 projektua. Voittajikse kolmes nominatsies piäzi 14 projektua, kudamii aktivistat ruvetah todevuttamah tänävuon.

Voittajien joukkoh puutui Anuksen karjalazet — liittogi. Se voitti Meijän ezi-ižien mua — nominatsies. Armas kieli — projektu sai vähästy enämmän 212 tuhattu rubl’ua. Tämä projektu on omistettu anuksen runoilijan Vladimir Brendojevan 90-vuozipäiväle. Vahnembi polvi hyvin tiedäy, gu Vladimir Jegorovič pani suuren panoksen karjalankielizen literatuuran kehittämizeh. Ruado projektan hantuzis rodieu työnytetty V. Brendojevan tuottehen kuhkutukseh da popul’arizatsieh, myös karjalan kielen da karjalazien kul’tuuran säilyttämizeh da kehittämizeh. Projektan pivot autetah nuorel polvel parembi tiijustua runoilijan panostu karjalankielizeh literatuurah, autetah kunnivoija oman muan histouriedu, sen perindyö da taboi.

Armas kieli — projektan todevuttamizen miärätty aigu on 15.kezäkuudu — 15.talvikuudu. Projektan hantuzis on azuo kaikenmostu piduo:

1) Minun hengen hyväkse — kirjalližus-folklouruseminuaru, kudai on omistettu V. Brendojevan tuottehele;

2) Buklietan painamine, omistettu V. Brendojevan 90-vuodehizele;

3) A parahači kodoirannal päin — tuttavusmatkan käzikirjutuksen keksimine karjalakse da ven’akse da sen sijoitus internettah;

4) Anuksen rahvahallizen teatran Yksi koppi, kaksi koppi, p’atakku — karjalankielizen spektaklin ozuttelu Priäžäs, Sortavalas, Anuksen piirin Mägrien da Kuujärven hierulois;

5) Sanal rovun elos pyzyy — kvest-kižan keksimine, omistettu Vladimir Brendojevan da Grigorii Makarovan tuottehele;

6) Karjalankielizen tiijoitusozuttelulavvan valmistandu da sen azettamine;

7) Karjalankielizien opastuspertilöin laudazien valmistandu da niilöin azettamine Anuksenlinnan keskiškolas №1;

8) Karjalankielizien uuličoin laudazien valmistandu da niilöin azettamine Kuujärven hierus.

Kai nämmä pivot projektan hantuzis pidäy todevuttua 15.talvikuun päivässäh. Koronantaudin täh projektan ohjelmu voibi vähäzel muuttuo. Vaigu yksisama Anuksen liygiläzet-liiton aktivistat pietäh enemät pivot karjalazien hyväkse da nuoreh polveh nähte, gu ozuttua karjalan kielen voindat. Toinah tämä suuri ruado auttau Anuksen piirin hierulois luadie uvvet olot karjalan kielen, literatuuran, kul’tuuran kehittämizeh nähte.