ANUKSEN ARHIIVAS

Joga kuudu kolmandennu pyhäpäivänny myö kerävymmö opastumah Anuksen kirjastos Karjalan sugupolviyhteiskunnan Anuksen ozaston joukonnu. Kevätkuul myö kerävyimmö Anuksen kanzallizen piirin haldivon zualas.

Täs meidy vastai Anuksen arhiivan ruadai Margarita Nikolajevna Prohorova. Häi myös on meijän Karjalan sugupolviyhteiskunnan Anuksen ozaston johtajannu. Margarita Nikolajevna saneli arhiivan histourieh nähte. Häi saneli, gu arhiivas on 197 fondan dokumentua, kaikiedah 26875 dokumentua. Bumuagudokumentua on 14134, persounallizen rahvaskunnan dokumentua on 12741. Dostalit dokumentat ollah Karjalan Tazavallan Kanzallizes arhiivas.

Meile oldih annettu kačottavakse dokumentat, kuduat voijah auttua omien sugujuurien da Anuksen piirin histourien tiijon ečindäs. Myö kačoimmo Suuren voinan 1941–1945 vuoziloin dokumentoi. Erähät meis löyttih pädeviä tieduo da ihasteltihes. Sugupolviyhteiskunnan ozanottajat kyzeltih Margarita Nikolajevnal arhiivan ruadoh da dokumentoin löydämizeh nähte. Sit kaikin saneltih omat mielet. Vastavuksen lopus Margarita Nikolajevna ozutti meile arhiivan huonukset da mittumis ololois ollah dokumentat. Kaikin jiädih hyväs mieles, gu tiijustettih äijy uuttu da otettih tieduo omien sugujuurien ečindöh. Himoittas, gu nengomat vastavukset oldas pietty joga vuottu.

Raisa Petrovna Safronova, Irina Nikolajevna Ivanova, Tamara Petrovna Nazarova, L’ubov’ Ivanovna Pettijeva, Tatjana Aleksandrovna Iljina da minä ruavoimmo arhiivas iččenäžesti. Myös meile oldih annettu individualizet nevvot.

Minä jo äijän tieduo keräin omah pereheh nähte. Nygöi minä keriän tieduo Sudalan školah nähte, kudamas opastuin seiččie vuottu. Tahtožin tiijustua opastajis enämbän. Duumain kai todevuu, ken eččiy, se löydäy.

Valentina PETRAŠ

Karjalakse kiändi Tatjana ROMANOVA