KONDU-PRUAZNIEKALE

Joga vuottu anuksilazet aktivistat ajellah Lodeinoin piirin Kondušin hieruh Kondu-pruazniekale. Sidä pietäh heinykuul. Tänävuon Anuksen liygiläzet, Korela-liittoloin da Nurmoilan kellozet-TOSan ezittäjät otettih ozua karjalazen kul’tuuran pruazniekale.

Pivon aigua kuului karjalaine pagin, rahvas hyväl mielel tansittih, kuuneltih rahvahallistu muuzikkua. Myös yhtes vedäjienke ozanottajat musteltih ennevahnallizii perehtaboi, primiettöi, karjalazien syömizien nimilöi. Myögi hyväl mielel otimmo ozua kilvois da tansulois.

Pruazniekan aigua Inga Gurilova, Ol’ga Kekšojeva da minä luvimmo Vladimir Brendojevan da Zinaida Dubininan runoloi kahtel kielel. Nurmoilan eläi Marija F’odorovna Trofimova pajatti karjalazen pajon. Anuksenlinnan taidoškolan opastai Julija Žuravl’ova pidi master-kluassua, kudaman aigua opasti nuorižuo kuduo vyödy. Anuksen liygiläzet-liiton johtai Vladimir Lukin andoi pruazniekan ižändöile kiitoskirjazet da lahjat. Kui häi sanoi: «On hyvä mieli, gu on olemas elopaikkua, kus kehitetäh muamankieldy da karjalastu kul’tuurua». Anuksilazetgi ei jiädy lahjoittah.

Pruazniekan lopus myö joimmo čuajuu šipainiekoinke da piiraloinke karjalazen kul’tuuran keskukses. Sen aigua pagizimmo da kučuimmo Anuksenlinnah Täs synnyirannan minun algu-festivualile, kudai rodieu pietty kuvvennu päivänny syvyskuudu. Pruazniekku loppih, a mieleh jäi varmus, gu tulienvuon myö uvvessah kerävymmö Kondušin hierus, gu ozuttua nuorižole, gu on olemas omamualaine kul’tuuru, kudai säilyy vaigu ihastunnuzien omih perindölöih ristikanzoin avul. Se rippuu vaigu meis, karjalazis.

Tatjana ROMANOVAN fotokuvat