MATKU KUUJÄRVEH

Kaheksandennu päivänny ligakuudu Anuksen liygiläzet — liiton aktivistat ajeltih Kuujärveh. Sinäpiän täs čomas lyydiläizes hierus školalluo kerävyttih rahvas. Täs oli pietty Lidija Ivanovna Potaševan mustolavvan avuamižet.

Tädä karjalastu naistu hierulazet mustellah hyväl sanal. Häi äijän vuottu ruadoi Kuujärven školas algukluassoin opastajannu, opasti myös lapsile lyydin murrehtu. Lidija Ivanovna oli ezmäzen lyydin murdehen aberin luadijannu. Se ilmestyi Suomes vuonnu 2003. A vuonnu 2007 ilmestyi Tervheks — luvendukniigu, kudamah liityttih Lidija Ivanovna Potaševan da Miikul Pahomovan runot da kerdomukset lyydin murdehel.

Mustolavvan avuamizen aigua Raisa Kopaneva saneli omamualazeh nähte. Školan pihal kerävyttih Lidija Ivanovnan yhteisruadajat, hänen opastujat da omahizet, tyttäret L’udmila, Svetlana, poigu Sergei da nuorembi vunukku Taisija.

Školas myös on azuttu muzei, kudamas on ozutteluseiny omistettu Lidija Ivanovna Potaševale. Tämä naine äijän azui muamankielen da kanzallizen kul’tuuran hyväkse. Myös häi äijän vägie pani hierun yhteiskunnallizeh ruadoh. Äijy hyviä sanuo oli sanottu tädä ristikanzuo mustelles.

Jälles mustolavvan avuamizii hierun eläjät kerävyttih kul’tuurutalois, kus oli pietty konsertu. Anuksenlinnan ližäopastuskeskuksen opastujat hyväl mielel piettih konsertua hierulazih nähte. Kuujärven eläjät hyvin otettih vastah lapsien soitandua da pajatandua. A mittumil magieloil piirualoil meidy syötettih! Passibo Kuujärven eläjät nengomas rahmannois vastuandas!

Tämä matku Kuujärveh oli pietty Anuksen liygiläzet — liiton projektan hantuzis. Mustolavvan avuamizet oldih pietty Lyydin idozet — liiton huhkutuksen mugah. Tiettäväine, on mieldy myö, gu pienis hierulois mustetah omamualazii, kuduat äijän azuttih muamamkielen hyväkse. Mustetah da azutah kai, gu nuorižogi tieadäs omii kuulužii eläjii. 

Tatjana ROMANOVA