BOBA LAHJAKSE

On tulemas parahin pruazniekku Uuzi vuozi, kudamua vuotetah lapset dai vahnembat. Rahvas jo talvikuun allus varustutah täh pruazniekkah: ajatellah mittumii syömizii ruvetah valmistamah stolale, ostetah lahjoi omahizil da ystävil. A tiijättögo työ, gu ihan Uvven vuvven pruazniekan iel talvikuun 29 päivänny on olemas Kuuzen bobien lahjoituksen päivy.

Tänä piän voibi lahjoittua čoma boba ostettu laukas libo azuttu omil käzil. Voibi kehoittua täh ruadoh lapsii libo vunukkoi. Duumain hyö hyväl mielel yhtytäh. Lapset suvaijah azuo lahjoi mugaže, kui suaha niilöi. A Uvven vuvven pruazniekan aigua kaikin vuotetah lahjoi, nuoret dai vahnat.

Mustatto, kui lapsennu bumuagas myö azuimmo girl’andoi, lumihiudalehii, keräzii. Nygöi internetas voibi kaččuo master-kluassoi da azuo kaikenmoizii bobii. Laukas on kaikkie mis azuo da mil čomenduo net. Vai olis himo tuvva hyviä mieldy omahizil da ihastuttua.

Kuuzen bobazil ollah omat merkičuksetgi. Keräine merkiččou Adaman juablokkua, kazvikset - uvven vuvven muanvägie, kelloine vardoiččou kaikes pahas, tuohus merkiččou hengellisty valguo, kuuzen tiähti - Viflejeman tiähtiä, kudai ozutti matkan vastesuadulluo Iisusalluo. Anna joga boba tuou vaigu hyvytty elaigah.

Boba voibi kiäritä čomah bumuagah libo vakkazeh, čomenduo se läpettäjil lentoil. Duumain joga meis nengoman lahjan riputtas kuuzeh. A lapsil olis hyviä mieldy, gu hyö nähtäs omil käzil azutut bobat pruazniekkukuuzel. Otakkuo mustokse da lahjoitakkuo tänä piän toine toizele kuuzen bobaine. Työ kummastutatto omahizii da eräs kerdu tuletto gostih vahnembilluo. Vahnembilhäi tiijättö äijiä ei pie hyväkse mielekse. Toinah kuuzen boba rubieu mustoittamah kui hyö iče konzuto ammui käydih gostih da lahjoitettih sugulaizile bobazii, kui hyö ihasteltihes toine toizele. Hyviä mieldy rodieu kaikil, lahjoittajil dai lahjan suajil.

Ven’al moudu čomenduo kuustu bobazil tuli XIX-vuozisual, konzu imperatricannu oli Aleksandra F’odorovna. Ihan häi enzi kerduo čomendi kuuzen bobazil, kudamat oldih azuttu täkse tarkoituksekse. Enne azuttih bobazii pahvis. Vuatas azuttih anhelien, lapsien da merimiehien bobavestoksii, kudamat oldih azetettu raudualustale. Bohatat rahvas voidih ostua st’oklu- da farfourubobazii, kudamii sil aigua tuodih Germuaniespäi.

Ven’al jälles Ligakuun vallankumovustu kodvan kuuzen čomendus oli kieletty. Vaigu vuonnu 1935 Prezidiuman käsky andoi vallan Nevvostoliiton eläjil tuvva kuuzen puuloi kodiloih da čomenduo Uvven vuvven pruazniekakse. Täs aijas algoi kuuzibobien tevolližusvalmistamine. Suuren voinan aigua hos oligi ylen vaigei ga yhtelläh kuuzibobien valmistanduo ei azetettu. Sil aijal bobazii azuttih kaikenmoizis jättehis: puus, vuatas, kiärehis, raudulangas.

Nygöi on olemas kaikenmostu kuuzibobua. Ostakkua libo azukkuo iče da lahjoitakkuo hyväkse mielekse omahizile. Ei ole suurdu eruo on boba kallis vai huovis, vaigu se olis lahjoitettu pehmiel syväimel da hyvienke toivotuksienke.

Tatjana ROMANOVA