LÄMMIN RUADO MIELDY MYÖ

Anuksen piiris jo ammuzis aijois on olemas neroniekkua ristikanzua, kui miesty, mugai naistu. Yhtet ollah hyvinny sepinny da puččimuasterinnu, toizet — ombelijinnu da nieglojinnu. Nygyaijal on kaikkie laukois, vai osta. Vaigu on naistu Anukses, kuduat hyväl mielel ommellah sobua, nieglotah omahizile lämmii noskii da alazii. Kai čomii bobii nieglotah omile lapsile. A muaman käzil azuttu boba lapsen syväindy lämmittäy. Tänäpäi minä sanelen teile, hyvät lugijat, omamualazes nuores naizes Tatjana Kirillovas.

Tuhukuul Anuksen kanzallizes kirjastos oli pietty Lämmin ruado mieldy myö-vastavus da ozuttelun avuamizet. Sen aigua anuksilaine naine Tatjana Kirillova saneli omas innostusruavos alazien da bobien nieglomizes da ozutti net lugijoile.

Kui saneli Tatjana, häi jo 5-vuodehizennu lapsennu algoi nieglomah. Opasti piendy tytärdy Jelena muamo. Tan’a hil’l’akkazin opastui nieglomah. Ezmäi häi niegloi sobua omil tyttilöil, myöhembä rubei nieglomah ičellesgi noskii, paidoi, žiliettöi.

Miehele mendyy 15 vuottu tagaperin nuori naine rubei nieglomah alazii. Hänen ezmäzet alazet oldih čomendettu Arhangelin aluen mezenskoil kirjoil. Myös häi otti alazien čomendavakse Änisniemen da Rannikoleläjien kirjoi.

Naistu ylen innostuttau luonnon čomevus. Sendäh omien alazien kirjois Tatjana käyttäy erilazii väriniittilöi. Hänen alazis voi olla kui kaksi, mugagi kolme-nelli värii. Tatjana Kirillovan alazet ollah ylen čomat. Joga puaral ollah omat nimet: Lemmenlehtiset, Kezäkuun yö, Lemmekki da muut.

Tatjana äijän lugou nieglomizeh nähte internetas, kniigois. Häi rubei eččimäh tieduo mittumii kirjoi liygiläzet naizet käytettih omis nieglomizis. Kui sanoi naine hänel puutui vähä mostu kirjuo. Änisniemen, Valgien meren rannikol, Kalevalan da Kostamuksen čupul jäi äijy kirjuo. Sendäh Tatjana enimyölleh käyttäy niilöi nieglomizes.

Anuksen čupul jäi ombeluskirjoi. Nuori naine opii kerran käyttiä niilöi alazien nieglomizes. Vuonnu 2020 häi niegloi alazet linduloinke. Sen ornuamentan häi otti kirjondetus käzipaikas. Nämmien alazienke häi opii omua neruo Kižin muzein Kirjondetut alazet-kilvas da voitti. Lahjakse naine sai matkan Kižin suarel yhtes tyttärenke. Vaigu kovid-pandemien täh naine puutui suarele mennyt kezän. Kaksi nedälii naine Oševnevan kois saneli turistoile alazien nieglomizes da niilöin karjalazis ornuamentois. Naistu mielytti ornuamentu, kudai on käytetty suarel ozutteluloil da tiedolavvoil. Kaksi nedälii häi niegloi alazii nämmien kirjoinke da karjalazii alazii lemmenlehtiset ornuamentanke. Kui sanoi Tatjana, lemmenlehtiset merkitäh armastustu. Čoma kirju on nellilehtisen imičän nägöine.

Kui saneli Tatjana, hänel on nieglottu ynnäline mifolougine kollektsii alastu. Sih händy innostutti Tatjana Berdaševan da Marija Kundoz’orovan Runola da sen kummallizet eläjät-kniigu da Karjalazet jumalat, Agrikolan luvettelu-kalenduaru. Kollektsieh kuuluu viizi puarua alastu: Veden Eme, Rauni, Kipinätär, Honkatar,Tuonen tytti. Jogahizeh puarah naine pani omat maltot, tunnot da tiedot. Häi kui taidoilii, mittuminnu nägi mifolougizii jumaloi, moizet niititgi otti nieglottavakse. Alazet roittih ylen čomat.

Vastavuksen aigua Tatjana myös saneli, gu häi nieglou lapsien bobiigi. Perehes on nelli lastu. Jogahizel ollah muaman käzil nieglotut kažizet, koirazet, jänöihyöt da muut elätit. Lapset hyväl mielel kižatah muaman käzil nieglottuloil bobil, muatah niilöinke kaglakkai.

Pidäy sanuo, gu nuori naine ylen tovelleh tartui nieglomizeh. Häi ylen vagavasti lugou pädeviä literatuuruo, eččiu tieduo internetas, pagizou da ottau nevvuo toizil neroniekoil. Vuozi vuodeh hänen malto nouzou.

Suurenke perehenke ei ylen äijy aigua jiä nieglomizekse, vaigu Tatjana ičekse piätti, gu joga päiviä häi rubieu nieglomah hos 2–3 riädyy. Myös häi nieglottuzis alazis da niilöin kirjois sanelou omas VK-verkos. Gu tahtonetto nähtä mittumii čomii alazii nieglou meijän omamualaine nerokas naine, ečikkiä Tatjanan sivuu Zametki KiTa VK-verkos. Ajattelen, työ äijän uuttu tiijustatto karjalazih alazih näh. Naine sanelou kirjois da ozuttau niilöin kuavoi. Myös täs voibi tilata alazet. Hyväsydämelline karjalaine naine hyväl mielel nieglou net teile. Tan’an alazet čomendetah da lämmitetäh jogahistu, kelle net on nieglottu.

Tatjana ROMANOVA

Jelena Fominan fotokuva
Valerii Kirillovan fotokuvat