MUAMO

Tule tytär, tule kuldu,

Ylen äijäl vuottazin.

Malitunkel vastah otan,

Jumalankel provodin.

Tule, panen kylyn lämmäh,

Vastan sinul pehmendän.

Kylyn jällel čuajuu valan,

Annan piirain paremban.

Matkois tulles sinä väzyit,

Mene viere, oijendai.

Minä sinun rinnal istun,

Käzii, piädy silitän.

Tule, otan suupan päčis,

Syö vai täyzi vaččaine.

Kuibo lapset, kuibo ruavos,

Kuibo mieros kävelet?

Kodih lähties repun keriän,

Kaikkie panen midä on.

Vaigu tule, kuni vuotan,

Kuni minä pastua voin.

Nygöi tiijan mi on tusku

Oma tytär loitton on.

Nygöi tiijan, nygöi uskon,

Tule, kuni vuottua voin.

Nygöi minä lastu vuotan,

Ikkunoi myö kävelen.

Sada kerdua pihal juoksen

Omua muamua mustelen.

Kučui muamo, tule, kuldu.

Yöt dai päivät vuottelen.

Aigua eule — sinä soita,

Sinun iändy kuundelen.

Tulizin — da eule kunne,

Soittazin — da eule kel...

Kodih kačon — kyynäl silmis,

Muamo vastah tule ei.

Ei pie, muamo minul čuajuu,

Iče sinul piirait toin.

Vaigu pertih minuu laske,

Ozutan, kai pastua voin.

Iče kylyn panen lämmäh,

Vastan sinul pehmendän,

Iče lihasuupan keitän,

Piädy sinun silitän.

Sydämes on jygei tusku,

Vaigu enne tiedäzin.

Muamo, sinä minuu vuotit,

Minä myöhä ellendin.

Tule, tytär, tule kuldu,

Äijäl minä vuottazin.

Malitunkel vastah otan,

Jumalankel provodin...

Alevtina ŠIDAREVA