SANELU KARJALAN KIELEL

23.sulakuudu Anuksen kanzallizes kirjastos oli pietty Sanelu karjalan da vepsän kielil — alovehienväline tego. Joga vuottu anuksilazet yhtytäh sanelun kirjutandah.

Tämä vuozi on ilmoitettu Voiton merkkipäivän da puolistajan vuvvekse. Sendäh sanelun tekstatgi ollah omistettu puolistajile da Voiton päiväle. Sanelun tekstu livvin murdehel oli otettu meijän omamualazen Zinaida Timofejevna Dubininan mustoksis. Konzu Anuksen piiri vuonnu 1944 oli piästetty vihažniekois, pienel Zinaidal oli kymmene vuottu. Sanelun tekstas oldih moizet sanat: «Enämbiä myö tatua emmogo nähnyh, emmogo kuulluh hänes nimidä. Sit jo konzu ajoimmo, mama ozutti minule jupkan, kuduan osti minule tata mustokse. Sih loppiettiheze tatan armot omis lapsis. Vai musto jäi». Net ylen hyvin ozutetah lapsen tuskat voinah nähte da atkalat tuattah nähte, kudai jiäkse jäi voinale.

Ylen mielyttäy se, gu yhtes täyziigäizienke saneluu kirjutettih Anuksen školan №2 nelländen kluasan opastujat. Jo ei yhty kerdua tämän školan opastujat yhtes opastajanke Nina Nikolajevna Bogdanovanke yhtytäh täh tapahtumah.

Sanelun ozanottajat ozutettih hyvät tulokset. Yksi ristikanzu sai 100 balluo, viizi ristikanzuo — enämbi 90 balluo, myös viizi ristikanzuo — enämbi 70 balluo. Vaigu yksi ristikanzu sai vähembi 50 balluo.

Lapsetgi ozutettih hyvät tulokset. Enimyölleh kaikin suadih enämbi 70 balluo. Kui sanoi karjalan kielen opastai Nina Nikolajevna Bogdanova: «Nengomat hyvät tulokset lapset suadih, gu heijänke kois paistah karjalakse buabat da died’oit. Lapset kuultah eläviä muamankieldy da heile on kebjiembi opastuo, ottua mieleh sanelun tekstua da kirjuttua sidä».

Tahton sanuo suuret passibot kaikile, ken yhtyi sanelun kirjutandah. Duumain tulien vuon myö uvvessah vastavummo kirjastos da karjalan kirjukielen hyväkse kirjutammo sanelun muamankielel. Ei häi nareko sanota, gu oma kieli on kanzan hengi.

Tatjana ROMANOVA