GOSTIS SAMANMIELIZILLYÖ

Joga vuottu anuksilazet aktivistat ajellah Lodeinoin piirin Kondušin hieruh Kondu-pruazniekale. Tänävuon sidä piettih 24 päivänny oraskuudu. Anuksen liygiläzet-liiton ozanottajat Vladimir Lukin, Galina Fedulova, Tatjana Romanova da meijän omamualaine kodialovehtiedäi Andrei Ponurovskii hyväl mielel yhtyimmö karjalazen kul’tuuran pruazniekkah.

Tädä jogavuodehistu Kondu-pruazniekkua pietäh vuvves 2014. Vaigu vie enne loittozes 1994 vuvves Kondušis oli pietty ezmäine Karjalan kižat — suuri karjalan kul’tuuran pruazniekku. Se keräi yhteh Lodeinoin piirin hieruloin da Anuksen čupun eläjii. Vahnembat yhtes nuorižonke yhtyttih täh pruazniekkah. Sil aigua Kondušin hierus eli enämbi rahvastu da karjalan kielen maltajua, migu nygöi. Lodeinoin kul’tuurukeskuksen ruadai Tatjana Jevgenjevna Fedorovskaja oli sil aigua kanzallizen kul’tuuran kehittämizen kuhkuttajannu. Hänen avul da himol rubei kehittymäh da säilymäh Kondušin hierus karjalaine kul’tuuru. Piettih kaikenmoizii pidoloi, gu kinnostuttua rahvastu omah kieleh, omih perindölöih.

Myöhembä tuli mieli pidiä jogavuodehistu Kondu-pruazniekkua. Tatjana Jevgenjevna Fedorovskoin ruado karjalazien perindölöin säilyttämizeh ei hävinnyh. Sidä jatkau Janegan kylän kul’turuukeskuksen johtai Jekaterina Nikolajevna Vencevič omien avuttajienke — Kondušin hierun kirjaston ruadajienke. Oli hyvä mieli kuulta Jekaterina Nikolajevnas, gu myö anuksilazet olemmo hyvien mielien innostuksennu, gu piemmö meijän Anuksen kanzallizes kirjastos kaikenmoizii pidoloi. Anuksen liygiläzet — liiton da Kondušin aktivistat ollah hyvinny ystävinny vuvves 2009. Sit enzi kerdua Lodeinoin piirin karjalazet oldih Anukses Karjalazien kerähmöl. Jälles tädä vastavustu algoi suuri ystävys rinnalolijienke karjalazienke.

Tänävuon pruazniekan teemannu oli Voiton 80-merkipäivy. Nuoret pajatettih vojennoloi pajoloi, opittih omua ozua kilbailulois. Vaigu pivon aigua kuuluigi rahvahalline muuzikku, karjalaine pagin. Myös yhtes vedäjienke ozanottajat musteltih ennevahnallizii perehtaboi, karjalazien syömizien nimilöi. Myögi Galina Fedulovanke hyväl mielel piimmö tiedokilvan perehen elokseh näh. Pivon ozanottajat musteltih karjalazien perindölöi, perehen taboi, hyväl mielel musteltih sananpolvii da perehenhengilöi karjalan kielel. Jälles piduo oli hyvä mieli kuulta, gu rahvas buitegu endizih vuozih puututtih da kuultih muamankieldy. Kondušis nygöi harvah kuulet karjalan paginua, gu nuoret ei paista da karjalakse maltajii jäi ylen vähä.

Anuksen liygiläzet-liiton johtai Vladimir Lukin andoi pruazniekan ižändöile kiitoskirjazen da lahjat. Kui häi sanoi: «On hyvä mieli, gu täs hierus kehitetäh muamankieldy da karjalastu kul’tuurua» .

Pruazniekan lopus myö söimmö greččukuaššua, kudai oli keitetty pihal suures kattilas, joimmo magiedu čuajuu. Sen aigua pagizimmo da kučuimmo Anuksenlinnah Täs synnyinrannan minun algu-festivualile, kudai rodieu pietty kuvvennu päivänny syvyskuudu. Pruazniekku loppih, hyvät mielet jiädih. Da jäi varmus, gu ystävys Lodeinoin piirin aktivistoinke ei kaduo. Gu tulienvuon myö uvvessah kerävymmö Kondušin hierus karjalazen rahvahan da meijän perindölöin hyväkse.

Tatjana ROMANOVA