KIŽIS SPUASANPÄIVÄNNY

Joga vuottu 19.elokuudu Kižin suarel pietäh suurdu kirikköpruazniekkua Spuasanpäiviä. Suarel se on kogo Ven’al kuulužan 22-kupolan Spuasan kirikön nimipruazniekku. Sidä vie sanotah Juablokkuspuasannu, gu täl aijal kerätäh juablokkua da fruktua. Tänäpiän täs pietäh vie tostu pruazniekkua Kižin voulostin päiviä.

Joga vuottu tänäpiän Kižin suarel tullah muzein kunnivoitetut gost’at — vahnoin rovuloin jatkajat, kudamien tuattolointuatat sroittih da säilytettih suaren kirikköi, igä igih saneltih vahnoi starinoi.

Algavuu suuri pruazniekku liturgiisluužbal, jälles kudamua kai gost’at voijah syvvä pyhäjuablokkua. Tänäpiän Kižin suarel juablokkua on kaikkiel — viršilois, komšazis, delegöis, venehis.

Myös Spuasanpäivänny suarel pietäh kelloloin soitandufestivualii, kudamas omua maltuo ozutetah Karjalan da kogo Ven’an parahat soittajat. Čoma kelloloin soitandu kuuluu kogo suarel. Gost’at hyväl mielel ollah pruazniekan ozanottajinnu da opitah omua iččie pruazniekkuohjelmas, kudaman aigua tuttavutah Karjalan Tazavallan kandurahvahien kul’tuuranke.

Mielyttäy, gu Spuasanpäivänny Kižin suaren pruazniekale puututtih On hengis kieli tuattoloin — lapsien runokilvan parahat ozanottajat Art’om Špakovič da Jelizaveta Karpova. Art’om opastuu Anuksenlinnan školas №1 kahendakses kluasas. Brihačču on innostunnuh verkopezämiäččyh. Vaigu se ei keskusta oppie omua maltuo runokilvas. Karjalan kieldy opastau kuuzi vuottu. Perehes muamankielel pagizou buabanke. Jelizaveta eläy Kotkatjärves, opastuu viijendes kluasas. Tyttöine ylen hyvin opastuu, hyväl mielel opastau karjalan kieldy.

Art’om dai Liza oldih Kižin suarel enzimästy kerdua. Lapsienke yhtes oldih heijän muamat. Lapsil dai vahnembil ylen mieldyi tämä suuri pruazniekku. Heih niškoi piettih mieldykiinittäjän tuttavusmatkan. Jälles hyö voidih kävellä da kaččuo pruazniekkuohjelmua, syvvä juablokkua, kudamil gostitettih kogo päivy. Ajattelen, gu vie kodvan lapset ruvetah mustelemah da sanelemah täs matkas Kižih. Ei muga puaksuh voibi suaha lahjakse nengoine matku da vie Spuasanpäivänny.

Tahtozin sanuo suuret passibot meijän kirjaston da lapsien nimilöis Kižin muzein johtajale, meijän omamualazele Jelena Bogdanovale. Jelena Viktorovna jo äijän vuottu on On hengis kieli tuattoloin — lapsien runokilvan auttajannu da azuu runokilvan parahile lugijoile nengomat lahjat — tuttavusmatkat Kižih. Lapset voijah nähtä vahnua karjalastu taloidu, sen huonuksii. Ylbeillä suaren pyhäkohtil, kiriköil, kudamii ennevahnas azuttih vahnoin rovuloin ezi-ižät.

Tatjana ROMANOVA