VASTAVUS KIRJASTOS

Tänävuon Anuksenlinnu täyttäy 375 vuottu. Vuonnu 1649 se oli nostettu, gu puolistuslinnu kudai ei piästänyh vihažniekoi Ven’an valdivoh. Myöhembä Anuksen guberniel oli annettu meijän linnan nimi.

Äijy midä voibi sanella meijän Anuksenlinnah nähte. Tänävuon Anuksen kanzallizes kirjastos rubiemmo pidämäh vastavuksii, kudamien aigua rubiemmo sanelemah meijän lugijoile linnan histouries.

14 päivänny pakkaskuudu anuksilazet kerävyttih Oh, oh Anuksenlinnu, kusbo algu, kusbo loppu — vastavuksel. Sen aigua meijän kuulužu fotokuvuaju Valerii Nikolajevič Kirillov ozutti linnan vahnoi fotokuvii kuduat saneltih Suuren voinan da sen jälles rauhastu aigua. Myös myö näimmö fotokuvii, kuduat ozutettih XVIII-vuozisuan linnua. Vastavuksel olijat rahvas hyväl mielel musteltih kui muutui linnu, mittumat koit oldih nostettu, a mittumat hävittih. Saneltih mittumua mustopačastu oli enne, kui muutui linnan Gagarinan augivo.

Myös oli ozutettu vahnat Anuksenlinnan kiriköt. Pidäy sanuo, gu ennevahnas meijän linnas oli nelli suurdu kirikkyö. Kaksi niilöis hävii. Kazanskoin Jumalan muaman kirikön huonukset jiädih, vaigu niilöi ei käytetä tarkoituksen mugah. Mariam suarel jo äijy vuottu seizou Smolenskoin kirikkö — ainavo linnas, kudai avuau omat veriät ristittyzil.

Äijy kaikenmostu fotokuvua oli ozutettu meijän lugijoile. Se innostutti erähii anuksilazii lugemah meijän linnale omistettuloi runoloi. Tämä ezmäine vastavus, kudai oli pietty linnan vuozisuan hantuzis andoi allun vastavuksil, kuduat roitah pietty vuvven aloh.

Vastavus toi hyviä mieldy kaikile. Lugijat buitegu järilleh puututtih lapsusvuozih. Passibo kaikil, ken tuli vastavuksel, lugi runoloi. Passibo Valerii Nikolajevič Kirilloval mieldykiinittäjäs kerdomukses da fotokuvis. Vastavuksen lopul anuksilazet piätettih, gu pidäy iellehgi pidiä nengomii pidoloi, gu mustoittua da parembi tiediä roindulinnan histouriedu. Hyväl mielel vuotammo tuliedu vastavustu, meijän hyvät lugijat. Vie jäi äijy saneltavuo da kačottavuo Anuksenlinnah nähte.

Tatjana ROMANOVA