VASTAVUS MÄGRIEN KYLÄS

Kylmykuul Muailman hyvyönpäivänny Anuksen piirin Mägrien kyläh oldih tuldu gost’at Petroskoispäi. Suuri vastavus todevui Opastus — valgo: kehitysplatformu — projektan hantuzis, kudai voitti da sai jengua Karjalan Tazavallan piämiehen fondaspäi. Tädä projektua kannattau Kižin muzei da Suomi-ugrilazien liitto-yhtevys, kudaman johtajannu on vepsäläine aktivistu Anna Anhimova.

Yhtes Annanke Mägrieh tuldih maltajat da nerokahat naizet: Darja Moskina, Margarita Kempainen, Nadežda Tološinova, Anna Isakova da Jelena Belousova. Tänäpiän Mägrien školas oli pietty master-kluassua da interaktiivistu ohjelmua.

Margarita Kempainen saneli algukluassoin opastujil ennevahnallizis karjalazis sovis. Mis ommeltih sobii, mittumat net oldih. Lapset hyväl mielel pandih net piäle. Myös ezmäzen da toizen kluassoin opastujih niškoi Anna Isakova vedi Minä suvaičen omua hebostu — opastustu. Sen aigua lapset tiijustettih, gu muanruadajan auttajannu oli hebo, kudai pellot kyndi dai jarmankal vedi. Heboine ennevahnas oli lapsien parahannu bobannu. Mägrien lapset hyväl mielel azuttih ičelles čomii hebozii.

Kuni nuorembat lapset azuttih hebozii, vahnembat tiijustettih kui ennevahnas kaunistettih piäpaikkoi. Nadežda Tološinova opasti lapsii panna mualuleimoi kangahale. Master-kluasan joga ozanottai jätti ičelles mualatun paikan lahjakse. A mittuman mieldykiinittäjän master-kluasan pidi Darja Moskina! Sen aigua lapset opastuttih soittua balalaikal. Erähät enzikerdua piettih käzis tädä soitinduo. Sendäh jiädih hyväs mieles, gu soitandu balalaikal sai hyvät tulokset.

Mägrien lapset tiijustettih äijän uuttu da mieldykiinittäjiä tieduo. Anna Anhimova školan kirjastole lahjoitti kniigat, kuduat kosketah meijän tazavallan kodialovehtieduo.

Päivän aloh Petroskoin gost’at käydih Floran da Lavran kirikköh. Myös Armas talois Margarita Lopuhina pidi tuttavusekskursiedu. Gost’at hyväl mielel tuttavuttih kylän nähtävyksienke.

Ajattelen, gu tämä suuri vastavus Mägrien kyläs ei olluh jälgimäine. Suomi-ugrilazien rahvahien liitto-yhtevys joga vuottu projektoin hantužis pidäy kaikenmoizii vastavuksii da opastuksii. Niilöin aigua ozanottajat čuglahtetahes ennevahnallizih karjalazih tavoih da perindölöih. Nengomat projektat autetah parembi tiijustuo roindumuan kodialovehtieduo.

Tatjana Romanova

Fotokuvat on otettu Suomi-ugrilazien liitto-yhtevyksen VK ryhmäs